نصائح وتعليمات

أسهل وأنجح طريقة للحصول على منحة دراسية

مجربة ومضمونة

بهاد المقال رح نشارك معكن معلومات عن طرق الحصول على المنحة بتوفر عليكن وقت كتير ومبالغ طائلة

أول شي لازم تعرفوه انو المنحة سواء كانت ممولة بالكامل أو ممولة جزئياً – حكومية أو خاصة مارح توصل لعندكن جاهزة على باب البيت ومارح تفيقو شي نهار واصلكن ايميل عم يقلك تفضلو هي المنحة والفيزا وفوقا راتب شهري كمان !

بالتأكيد عملية التقديم عالمنح هو موضوع متعب نفسياً لكن تذكر انو المنحة رح تعطيك راتب شهري (على سبيل المثال) 1500 دولار .. صح؟ أنت ببلدك أديش بدك تشتغل وتبذل جهد لحتى تطالع هالمبلغ؟؟ .. بتوقع مو أقل من شغل 8 ساعات باليوم ٤٨ ساعة أسبوعيا يعني 240 ساعة شهرياً حتى توصل لهي ال 1500 دولار !!

لذلك انت اذا استثمرت ساعتين من وقتك كل يوم لحتى تقدم على 4 منح أسبوعياً يعني 16 منحة شهرياً بهالحالة بترفع نسب قبولك بالدراسة برا وبتحقق طموحك وتكمل دراستك بالمجال اللي بتحبو.

تانياً لاتفكر بالعدد المحدود للمقاعد الدراسية المطروحة .. انت عليك انك تتبع شروط المنحة وتأمن أوراقك وتبذل الجهد اللازم لحتى توصل لمرحلة تقتنع معها انو الشي اللي عم تعملو رح يكون الو نتيجة ايجابية .. تذكر انو ماحدا بيقدر يعطيك المنحة اذا انت مابدك ياها.

تالتاً الأوراق والشهادات يلي بتجهزها لأول منحة رح تستمر معك لكل المنح اللاحقة وصلاحيتها بتكون حوالي سنة أو سنتين .. الشي الوحيد يلي رح تكتبو بنفسك وتبذل عليه الجهد كل مرة هو رسالة الدافع فما غلط انك تستثمر وقت لتكتبها بالشكل الصحيح وبعدين تعدّل عليه ليناسب أي منحة جديدة.

رابعاً لازم تعرف انو مافي أي سر مخبّى بموضوع تحصيل المنحة غير الاصرار والأمل ويكون موضوع تأمين المنحة هو الدافع الأول والأخير عندك.

هلأ كيف ممكن تلاقي المنحة بنفسك بدون ماتستنا حدا

أولاً أنت كطالب عم تدور ع منحة لازم تكون محدد مسبقاً:
1- الاختصاص يلي بدك تدرسو.
2- البلد يلي حابب تدرس فيه.
3- لغة الدراسة.

تانياً الحصول على المنحة:
كل دولة فيها نوعين من المنح ومابيمنع أبداً انو تقدم عليهن بنفس الوقت .. النوع الأول هو المنح الحكومية وهاد بكون ممول بالكامل ومعو راتب شهري وفيو ميزات تانية وممكن تعرف عن هالنوع عن طريق المواقع الرسمية لوزارات التعليم أو مواقع الخارجية ضمن البلد أو مواقع رسمية تابعة لهي المنحة.
النوع التاني من المنح بكون مقدم من الجامعات نفسا (الحكومية أو الخاصة) بغض النظر عن المنح المقدمة عن طريق الحكومة ومنرجع منأكد انو مابيمنع أبداً تقدم على كل المنح بنفس الوقت.

تالتاً لازم تعرف تفاصيل كل منحة وشروطها ومواعيد التقديم عليها وهاد الشي بما إنك حددت البلد فعندك طريقتين لتعرف الجامعات الحكومية والخاصة بهي البلد.. الطريقة الأولى انو تفوت ع الموقع الرسمي لوزارة التعليم ضمن البلد والطريقة التانية تفوت على جوجل وتكتب مثلا universities in Holland او أي بلد مقدم المنحة بيطلعلك كل الجامعات الحكومية والخاصة .. هون بتفتح مثلا ملف اكسل وبتكتب فيه اسماء هي الجامعات بعدين بتفوت عموقع كل جامعة وبتتصفح قسم المنح فيه وبتسجل بملف الاكسل شروط كل منحة ومواعيد الافتتاح والتقديم وبتبدا بتأمن الشهادات والأوراق المطلوبة لكل منحة وبتسجل شو ناقصك وبتحدد الوقت اللي لازمك لحتى تكتب رسالة الدوافع بشكل بطيء.

اذاً المحرك الأساسي بموضوع المنحة هو حضرتك كطالب وكمية الجهد اللي عم تبذلها لحتى تاخد المنحة.. لذلك نصيحتنا الك تستثمر بنفسك وتستخدم جوجل كمصدر مجاني لكل المعلومات وجوجل ترانسليت بيقدر يترجملك أي موقع بيصعب عليك وبعدين اذا عندك أي استفسار فيك تبعتلنا ياه برسالة عالصفحة ورح نجاوبك.

 

 







مقالات ذات صلة

زر الذهاب إلى الأعلى